Banka e Shqipërisë bën apel qeverinë që të ketë kujdes me menaxhimin e buxhetit në këtë periudhë krize. Guvernatori gent Sejko ka raportuar në Komisionin parlamentar të Ekonomisë dhe Financave, ku prej ditësh tashmë po diskutohet projektbuxheti 2023 dhe paketa fiskale që e shoqëron. Sejko rekomandoi kujdes me përdorimin e parave të taksapaguesve, ndërsa sugjeroi shtimin e fondit rezervë në buxhet dhe monitorimin e vazhdueshëm të sektorit energjetik dhe realizimit të buxhetit, për të ndërhyrë në kohë pa rrezikuar rritjen e deficitit.
Ndërsa harmonizimi i politikave që merr Banka Qendrore dhe atyre që ndërmerr qeveria, sipas Sejkos është ilaçi i vetëm për krizën.
Duke parë nga e ardhmja dhe kostot gjithmonë e më të mëdha për të mbuluar gropën e pensioneve, Guvernatori sugjeroi gjithashtu reformimin e skemës së sigurimeve shoqërore.
Banka e Shqipërisë identifikon si rrezik potencial edhe programin e Partneritetit Publik-Privat. Ashtu sikur janë shprehur më herët edhe partnerët ndërkombëtarë, banka sugjeron vendosjen e një limiti për vlerën e përgjithshme të PPP-ve, përzgjedhjen me kujdes të projekteve sipas programit strategjik të investimeve dhe një monitorim më të kujdesshëm të tyre.
