“Dëgjuam ulërima” Gazetarja rrëfen momentet e tmerrit në plazhin e Potamit

Gazetarja Esmeralda Keta ishte dëshmitare okulare e ngjarjes tragjike që i mori jetën 7-vjeçares Jonada Avdia.

Në një deklaratë për media, ajo rrëfeu momentet e tmerrin pak sekonda pasi vogëlushja u godit nga skafi që drejtohej nga komisari Arjan Tase.

Gazetarja tregoi se në momentin e kur vajza e godit nga gomonia dëgjoi ulërima dhe pa njerëz që shtrëngonin kokën me duar, teksa nxitoi të nxirrte fëmijët e saj nga deti.

Ajo tregoi se pa trupin e vogëlushes në breg të detit dhe se skafi po bënte rrotullime të pakontrolluara.

“Nuk e pashë momentin kur u godit vajza, por dëgjuam ulërima. Më pas pamë njerëz që shtrëngonin kokën me duar. Mora fëmijët e mi, i nxora nga deti. Pastaj fatkeqësisht pashë një trup fëmije buzë detit. Ishte një ngjarje shokuese dhe për mënyrën se si e vogla iku nga kjo jetë. Trupi i dëmtua rëndë, mjeti kishte fuqi motorike të lartë. Njerëzit mes asaj dhimbje gjetën kurajën t’i kërkonin llogari personit përgjegjës. Pashë vetëm momentin e fundit kur skafi po bënte disa rrotullime sepse e kishte humbur kontrollin, pasi kishte goditur fëmijën. Këputi një nga litarët e kordonit të sigurisë. Drejtuesi i mjetit kishte një moment kur vendosi duart në kokë. Pushuesit iu afruan kërkuan llogari. Kur u mor vesh që kishte shërbyer në Komisariatin e Himarës dhe mbante veshur uniformën e policisë pati dyshime për manipulim provash”, tha ajo.