“Më ofenduan” Ministrja britanike e sapoemëruar lë nam, i drejton gishtin e mesit protestuesve (VIDEO)

Ministrja e sapoemëruar e Arsimit në Britaninë e Madhe Andrea Jenkyns është vënë në qendër të kritikave.

Ajo është filmuar teksa i tregon gishtin e mesit protestuesve të fushatës “Bye Boris” që ndodheshin përpara Doëning Street.

Turma po priste rezultatin e mbledhjes që vendosi fatin e Kryeministrit.

Deputetja konservatore e ka mbrojtur gjestin e saj ndaj turmës së protestuesve kundër Boris Johnson, duke thënë: “E humba durimin, sepse më ofenduan”.

Deputetja konservatore dhe ministrja e re e Arsimit e sapoemëruar, gjithsesi ka pranuar se ajo ‘duhej të kishte treguar më shumë qetësi’ gjatë incidentit.

“Duhet të kisha treguar më shumë gjakftohtësi, por edhe unë jam njeri”, shtoi zonja Jenkyns.

Ajo tha se po mbronte veten e saj pasi iu nënshtrua ‘abuzimit’ gjatë viteve, duke përfshirë dy kërcënime me vdekje në javët e fundit.

Ndërkohë vetë konservatorët e sulmuan sot ministren e tyre pasi videoja u bë publike. Udhëheqësi i Dhomës së Deputetëve, Mark Spencer ka thënë se i takon zonjës Jenkyns të ‘justifikojë’ veprimet e saj, ndërsa ish-ministri i shkencës George Freeman e kritikoi sjelljen e saj, duke e konsideruar si ‘të tmerrshme’.