Kryetarja e Lëvizjes Socialiste për Integrim Monika Kryemadhi ka thënë se kreu i qeverisë Edi Rama mund të shkarkojë ndonjë ministër, për të tërhequr vëmendjen nga denoncimi i bërë prej saj ditën e sotme, ku dy pensionistë rezultojnë milionerë pa dijeninë e tyre, pasi janë përdorur nga persona të lidhur me inceneratorët.
Ajo tha se Rama e bëri një gjë të tillë me databazën e pagave, që sipas saj doli në publik për të larguar vëmendjen për denoncimet ndaj inceneratorëve.
Kryemadhi tha se një gjë të tillë Rama mund ta përsërisë duke shkarkuar ministren Olta Xhaçka. Por kryetarja e LSI shtoi se “s’ka asgjë të keqe” që bashkëshorti i ministres është shpallur investitor strategjik. “Ore më mirë ta marrë ai se sa t’ju vjedhin kartat dhe pensionet pensionistëve”.
“Nxorëm ne inceneratorët në mars, nxori pagat për të larguar vëmendjen. Mos u çudisni kur të shkarkojë ndonjë ministër tani, për të larguar vëmendjen. Mos bën viktimë Olta Xhaçkën, thotë do ta shkarkojë këtë për të harruar vëmendjen.
Nuk është Olta Xhaçka se tentoi të bëjë krim. Krim në tentim e ka, që ia dhanë statusin e investitorit strategjik burrit. S’ka asgjë të keqe, ore më mirë ta marrë ai se sa t’ju vjedhin kartat dhe pensionet pensionistëve. Mos u çudit të bëjë kovë pusi siç bëri ministrin dhe Bllakon”, deklaroi Kryemadhi.
