Një azilkërkues shqiptar pretendon se ka rënë viktimë e trafikimit. Duke folur për The Guardian ai ka theksuar është në “gjendje shumë të keqe mendore” teksa është i detyruar që të marrë avionin për në Ruanda, një vend për të cilin ai nuk di “asgjë”.
26-vjeçari shqiptar është një nga shtatë azilkërkuesit që kanë nisur sfidat ligjore të minutës së fundit për të shmangur fluturimin me forcë në vendin e Afrikës Lindore.
Të tjerët janë tre iranianë, një azilkërkues irakian dhe një vietnamez. Të gjithë mbërritën në Britaninë e Madhe me varka të vogla në mes të majit. Viktimat e dyshuara të trafikimit supozohet se do të hetohen plotësisht para se të largohen nga Britania e Madhe.
“Në Shqipëri jam shfrytëzuar nga trafikantët për gjashtë muaj. Më trafikuan në Francë. Nuk e dija se në cilin vend po më çonin”, është shprehur 26 vjeçari.
Ai tha se kur e hipën në një varkë të vogël në Francën veriore, iu dha të kuptonte se trafikantë të tjerë do ta prisnin kur të mbërrinte në Britaninë e Madhe.
“Jam në një gjendje shumë të keqe mendore. Nuk di asgjë për Ruandën. Nuk kam qenë kurrë në Afrikë dhe nuk mendoj se do të jetë e sigurt për mua. Unë nuk mund të kthehem në Shqipëri sepse trafikantët atje do të më vrasin. I vetmi vend i sigurt për mua është Britania e Madhe. Si mund të dërgojnë një shqiptar në Afrikë?”, është shprehur ai për The Guardian.
