Monika Kryemadhi tregon armën e saj më të fortë në politikë

Kryetarja e LSI, Monika Kryemadhi ka treguar anën e saj më të fortë. Në një intervistë për gazetarin Adi Krasta, Kryemadhi ka thënë se është sinqeriteti çka e bën atë më të fortë. Liderja e LSI tha se gjatë rrugës ajo dhe partia e saj, kanë bërë gabime, por e rëndësishme është që të kërkohet falje.

“Për shkak të gjuhës së drunjtë të liderëve të LSI, që të mos flas se mos bëj gabime, nuk kanë treguar të vërtetën asnjëherë. Në këto 8 vite njerëzit që iu janë prishur interesat kanë baltosur LSI-në. Kemi bërë edhe ne faje, gabime sigurusht, por është si ai njeriu që ha bukë e pretendon të mos bëjë thërrime.”- tha zonja Kryemadhi.

Ajo shtoi ndër të tjera se: “Arma ime më e fortë është sinqeriteti. Kjo më ka mbajtur mua atë që jam, ndryshe nuk do kisha rezistuar dot”.

Kryemadhi komentoi edhe marrëdhëniet e saj edhe me ish-ambasadorin e SHBA-ve në vendin tonë, Donald Lu.

“Marrëdhënia me Donald Lu ishte shumë e mirë. Kam menduar gjithmonë që zoti Lu dhe shumë të tjerë janë manipuluar dhe mashtruar në mënyrë permanente nga Rama dhe kabineti i tij.”- shtoi ajo.