Zbardhet dëshmia tjetër e Nuredin Dumanit: Talo Çela eleminoi nënën e trafikantit në vitin 2013

Dëshmia e të penduarit të drejtësisë Nuredin Dumani, ka zbardhur një krim që dyshohet se është bërë nga Talo Çela.

Sipas tij, pas vrasjes së Fatmira Dedës, nënës së Elvi Dedës, fshihet Talo Çela. Abc News raporton se ky i fundit ka eleminuar Fatmira Dedën, një vit pasi viktima kërkonte drejtësi për vrasjen e djalit të saj, duke qenë se autorët endeshin të lirë.

Kujtojmë se Fatmira Deda u gjet e pajetë në 14 shtator të 2013-ës. Dyshohet se 60-vjeçarja u qëllua me mjete metalike, teksa po futej për të marrë makinën në garazhin e një pallati pranë banesës saj në zonën e Fermentimit, në lagjen “Skëndërbej”.

Goditja në pjesën e pasme të kokës ishte fatale dhe i solli vdekjen e menjëhershme, ndërsa autorët u larguan në drejtim të paditur.

Fatmira Duma ishte nëna e Ervis Dedës, një emër i njohur për policinë si anëtar i një rrjeti trafikantësh droge në vendet perëndimore. Ai u ekzekutua një vit para nënës së tij, por edhe vrasja e tij ka mbetur e pazbardhur nga organet e drejtësisë.