“Jemi të barabartë”/ Kurti ‘vesh’ Kryeministrinë e Kosovës me flamurin e LGBT-së

17 maji shënon Ditën Ndërkombëtare kundër Homofobisë, Transfobisë dhe Bifobis. Për këtë arsye kryeministri i Kosovës, Albin Kurti ka vendosur që të mbulojë Kryeministrinë e Kosovës me flamurin e LGBT.

Kurti është solidarizuar me personat e komunitetit LGBTIQ+, duke postuar një fotografi të ndërtesës së Qeverisë me flamurin shumëngjyrësh, teksa shkruan se jemi të gjithë barabartë, edhe nëse dallojnë në besim apo orientim.

“Sot ne shënojmë #IDAHOT, një ditë që na kujton se jemi të gjithë të barabartë – pavarësisht nga orientimi ynë seksual apo identiteti gjinor. Le të qëndrojmë së bashku kundër padrejtësive dhe paragjykimeve, sot dhe çdo ditë”, shkroi Kurti në Twitter.

Në datën 15 mars në Kosovë është votuar kundër projektligjit për martesën e homos*ksualëve. Në momentin e votimit, të pranishëm në sallë ishin 77 deputetë, ndërsa 16 prej tyre nuk e kanë shfrytëzuar të drejtën e votës. Nga 61 deputetë që votuan, 28 prej tyre votuan pro, 29 kundër dhe 4 deputetë kanë abstenuar.