“Me Berishën nuk negociojmë” Presidenti i ri, flet Rama: Do presim me durim

Kryeministri Edi Rama u shpreh pasditen e sotme se Partia Socialiste nuk i ka 84 vota, ndaj dhe nuk mund të zgjedhë Presidentin e ri në 3 raundet e para, pa u ulur në negociata me opozitën.

Rama tha se gjatë kohës që PS ka qenë në opozitë ka hyrë në procese negociatash, pavarërësisht se në rastin e parë gjërat vajtën si vajtën dhe PD siguroi 84 votat, ndërsa herën e dytë u zgjodh një nga emrat e partisë që ishte në pushtet.

Kryeministri tha se tashmë dihet se me kë nuk negociojmë dhe nuk e marrim në konsideratë për asgjë.

“Kemi përballë një opozitë të bërë copë e çika dhe në kushte të tilla nuk e dimë me kë të negociojmë. Ne jemi në pritje që palët e tjera të vijnë në negociata, por nëse ata vijnë me kushte duke thënë pranoni këtë dhe pikë, atëherë le ta provojnë të paraqesin emrin dhe të vijë në seancë”, tha Rama.

Ai tha se ne si mazhorancë mund të shprehim dëshirën dhe vullnetin, të tregojmë durimin, aq sa e përcakton edhe Kushtetuta, pastaj do të jetë vota që do e zgjedhë Kreun e Shtetit në raundin e 4 apo të 5.