Një i ri ka humbur jetën në fshatin Divlakë të Lipjanit në Kosovë, ndërsa ishte duke qëndruar për vizitë te dajat e tij.
Sipas mediave në Kosovë, viktima, i cili thuhet se ishte diku rreth 17 vjeç, është dërguar pa shenja jete në Qendrën e Mjekësisë Familjare në Komoran rreth orës 14 e 40, ku edhe mjeku kujdestar ka konfirmuar vdekjen e tij.
Sipas mjekut kujdestar, Dr. Feriz Bytyqi, viktimës nuk i është vërejtur ndonjë shenjë dhune.
“Sipas familjarëve, i ndjeri ka qenë te dajat, duke i ndihmuar me disa punë dhe në momentin që është ulur të pushojë, i është përkeqësuar gjendja. Rreth orës 14:40 viktima është sjellë pa shenja jete në qendrën tonë. Shkaku nuk dihet por dyshohet të ketë qenë ndonjë arrest kardiak apo edhe goditje në tru por me konstatimin merret Instituti i Mjekësisë Ligjore”, ka thënë Bytyqi për Klankosova.tv.
