Një aksident i rëndë ndodhi sot në Has.
Drejtuesi i një kamioni humbi jetën pasi u hodh nga mjeti të cilit iu prish sistemi i frenimit në ecje e sipër.
Për t’i shpëtuar aksidentit tragjik, 35-vjeçari me iniciale S.J u hodh nga automjeti, por për fatin e keq nuk arriti të mbijetonte.
DPSHTRR ka reaguar përmes një statusi në rrjetet sociale ku shprehet se mjeti me të cilën udhëtonte 35-vjeçari ishte i çrregjistruar, pa targa dhe pa kolaudim
NJOFTIMI I PLOTE
Përsëri një fatalitet nga një aksident rrugor. Keqardhje e ngushëllime familjes për këtë fatkeqësi.
Ndërkaq lajmi flet për një kamion pa frena, ndaj DPSHTRR verifikoi menjëherë rastin me shqetësimin e statusit të kontrollit teknik. Siç vërtetohet edhe nga fotot, mjeti rezulton i çrregjistruar, dokumentacioni dhe targat janë depozituar konform procedurave në rajonalen përkatëse. Ky mjet nuk duhet të ishte në qarkullim, nuk ka targa, nuk ka kolaudim, nuk ka siguracion!
Krahas dhimbjes për lajmin i bëjmë thirrje përdoruesve të mjeteve të shmangin shkelje të tilla me rrezik për jetën e drejtuesit të mjetit dhe të tretëve në trafik, si edhe nxisim organet e kontrollit rrugor për masa drastike ndaj rasteve kaq flagrante!
