Kryeministri Edi Rama ka dalë në një konferencë urgjente përpara gazetarëve ku ka folur edhe për rritjen e çmimit të naftës.
Sipas tij, kjo gjë nuk varet nga qeveria, por nga tregu.
Kreu i qeverisë shtoi se kjo vjen si pasojë e luftës dhe konfliktit në Ukrainë.
“Kjo vjen si rezultat i diskutimit të brendshëm mes vendeve të aleancës për bojkotimin e naftës ruse. Njëkohësish si rezultat i diskutimit lidhur me varësinë nga gazi rus, që bën 40% të furnizimit në Europë. Ndërkohë që vendet e mëdha të aleancës ndeshen me kritikën në rritje se po financojnë luftën duke blerë gazin.
Bojkoti i naftës dhe gazit do ishte një ndryshim tektonik me pasoja vështirësisht të parashikueshëm në afatshkurtër. Shqipëria nuk bën asnjë përjashtim, është e prekur njësoj si vendet e tjera dhe dua të sqaroj edhe njëherë që diskutimi për çmimin e naftës në Shqipëri, si çdo vend tjetër ndikohet nga tregu, jo nga vendimet e qeverisë. Është i pjesshëm për shkak se nuk merret parasysh që në strukturën e çmimit ne kemi kontribute që në vendet e tjera paguhen veçmas. Shumatorja e shpenzimeve të atyre që konsumojnë naftë, është njësoj. Mjafton të merrni dhe të bëni përllogaritjet e taksave që paguajnë në vendet e tjera, jashtë çmimit të naftës. Me një ndryshim në këtë rast në favor të atyre që konsumojnë më pak, që paguajnë më pak” – tha Rama.
