Një ngjarje e rëndë ka ndodhur në Prishtinë. Një nxënës vetëm 14 vjeç është qëlluar për vdekje me thikë në Vrajec jo shumë larg shkollës “Hilmi Rakovica”.
Sipas dëshmitarëve nga vendi i ngjarjes, nxënësi u ther me thikë disa herë teksa po shkonte në shkollë.
Zyrtarisht nuk është konfirmuar ende arrestimi i ndonjë të dyshuari, ndërsa mësohet se në komisariat është shoqëruar një i mitur.
Në oborrin e Qendrës së Mjekësisë Familjare në Vranjevc ka zbarkuar një numër i konsiderueshëm i zyrtarëve policorë, aty ku mjekët konstatuan vdekjen e viktimës.
Më pas në vendngjarje shkoi edhe makina e Mjekësisë Ligjore.
Motivet e vrasjes nuk dihen ende, por policia tha se po punon intensivisht në zbardhjen e rastit.
” Sot rreth orës 07:30, kemi pranuar informatën për një rast vrasje, në rrugën “Fahri Fazliu”, në Prishtinë. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore. Bazuar në të dhënat fillestare, personi i cili dyshohet se ka marrë lëndime të rënda nga një mjet i mprehët (thikë) dhe i njëjti është dërguar në Qendrën e mjekësisë Familjare (QMF), ku dhe është konstatuar vdekja e tij. Vdekjen e viktimës R.H. mashkull 14 vjeç, e ka konstatuar ekipi mjekësor në QMF. Aktualisht hetuesit policor kanë nisur një hetim për sqarimin e të gjitha rrethanave që lidhen me rastin”, thuhet në njoftimin e policisë.
