“E kuptoj që ka krijuar shumë audiencë” Arben Ahmetaj mik i Klodian Zotos? Rama bën ironi me ‘Big Brother VIP’

Kryeministri Edi Rama i është përgjigjur me ironi pyetjeve të bëra nga drejtuesja e Komisionit Hetimor për Inceneratorët, Jorida Tabaku.

Ajo i kërkoi Ramës informacion për lidhjet e deputetit Alqi Bllako dhe zv.kryeministrit Arben Ahmetaj me përfituesit e kësaj afere.

Lidhur me këtë, kreu i qeverisë nuk ka preferuar të japë asnjë përgjigje, duke i thënë Tabakut se po shkel ligjin, pasi nuk ka asgjë të faktuar por i ka të gjitha opinione.

Rama nuk ka lënën pa përmendur dhe spektaklin “Big Brother VIP”, duke e krahasuar me situatën që po ndodhte në Komisionin Hetimor.

Pjesë nga debati: 

Tabaku: A keni informacion se babai i Alqi Bllakos përfitonte nga inceneratorët?
Rama: Unë e çmoj shumë disponibilitetin tuaj, por s’dua t’ju them se shkelët sërish ligjin. Ju nuk keni faktuar asgjë, keni krijuar një opinion tuajin, të cilin mbajeni për vete. Faktet këtu, mendoj unë, janë ato që kemi ardhur t’i çojmë bazuar në dokumente, jo në opinione të krijuara mbi spekulime, që secili ka të drejtën ti bëjë për të dalë në konkluzione. Nuk shoh asnjë lidhje deri tani mes pyetjeve dhe rolit, për të cilin kam ardhur këtu.

Tabaku: A është Arben Ahmetaj një mik i afërt me tre përfituesit e tre inceneratorëve?
Rama: Unë e kuptoj që Big Brother në këtë periudhë ka krijuar shumë audiencë dhe mbase mes nesh ka pasur që e kanë ndjekur, por se kush është miku i kujt, se kush fle me kë, se kush zgjohet me kë, nuk janë të parashikuara në dispozitat kushtetuese të rolit të kryeministrit. Meqë m’u drejtuat si zoti Rama, si zoti dëshmitar, po ju përgjigjem se si kryeministër kjo është jashtë kompetencave të mia të studio miqësitë e secilit prej jush me secilin prej jush, si dëshmitar mendoj se po shkelni ligjin, ndërsa si zoti Rama po ju them se jam i painteresuar, edhe kur dilja me pantallona shkurtra se tani ju ka ikur koha, se çfarë bëjnë tjerët dhe kam refuzuar të them se çfarë bëj vetë.