Saimir Tahiri takohet me familjarët, zbulohet burgu ku do të vuajë dënimin

Prej tre ditësh ish-ministri i Brendshëm Saimir Tahiri po mbahet i izoluar në burgun 313 te rruga “Jordan Misja” në Tiranë, pas vendimit që dha Apeli i GJKKO për ta dënuar me 3 vite e katër muaj burg.

Të hënën paradite Tahiri zhvilloi takime në ambientet e paraburgimit me familjarët dhe dy avokatët mbrojtës, Maks Haxhiaj dhe Dritan Jahaj. Ai tregoi se Tahiri ishte i qetë, ndërsa në ditët në vijim do t’i drejtohen me rekurs gjykatës së lartë për vendimin e apelit.

Ish-ministri qëndron I izoluar në katin e dytë të godinës numër dy të këtij institucioni dhe qëndron në një dhomë i vetëm I pajisur me frigorifer dhe televizor. Burime nga drejtoria e Përgjithshme e Burgjeve bëjnë me dije se, në ditët në vijim pritet transferimi i tij në burgun e Rrogozhinës, kjo për shkak se burgu i Vaqarrit është në rikonstruksion.

Për një periudhë 10 ditore ish-ministri do të jetë në vëzhgim nga autoritetet e burgjeve për arsye sigurie kjo për shkak se në ambientet e burgut 313 qëndrojnë të dënuar me rrezikshmëri të lartë. Saimir Tahiri u dënua  nga gjykata e apelit të posaçëm me 3 vite e katër muaj burg për shpërdorim detyre.