Kryeministri Edi Rama ka njoftuar sot nga Berati se duke nisur nga janari i vitit 2022 do të mbyllen sportelet dhe gjithçka do të bëhet online.
Teksa prezantoi ligjin e bashkëqeverisjes, ai theksoi se tashmë do të eleminohet lëvizja e qytetarëve në shumë zyra dhe aplikimi do të bëhet vetëm online.
Ndër të tjera kreu i qeverisë shtoi se pritet që në janar të ketë akses të plotë në shërbimet administrative përmes smartfonit apo kompjuterit dhe fillimi i mbylljes së sporteleve, duke i dhënë fund radhëve, zvarritjeve, rryshfetit.
“Të gjithë punonjësit e sporteleve do të bëjnë punën pas ekranit të telefonit. Aplikon për një shërbim dhe merr përgjigje dhe në këtë fazë një pjesë e madhe e aplikimeve e marrin përgjigjen e drejtpërdrejtë në telefon ose në kompjuter, një pjesë jo. Nëse aplikon për titullin e pronësisë në kadastër, nuk e merr titullin në telefon por duhet që të shkosh ta marrësh. Ne po përpiqemi që jo vetëm aplikimin por edhe marrjen e dokumentit ta marrësh online”, ka thënë ai.
