Deputeti i Partisë Demokratike Flamur Noka i ka dërguar një letër drejtuesit të Policisë së Shtetit, Gledis Nano.
Në të ai ka shprehur shqetësimin për mënyrën se si është rrethuar perimetri i selisë qendrorë të PD, ku kanë qenë të pranishme forcat speciale si FNSH, RENEA.
Sipas Nokës, ky veprim është në kundërshtim me çdo akt dhe normë.
“Gjatë zhvillimit të Kuvendit Kombëtar të partisë Demokratike, ditën e shtunë në datën 11 dhjetor 2021, që nga ora 12:00 deri në orën 18:00 policia ka mbajtur të rrethuar të gjithë perimetrin e selisë qëndrore të PD duke qenë të pranishme forcat special si FNSH, RENEA në kundërshtim me çdo akt dhe normë.
Duke u nisur nga këto fakte kërkojmë informacion nga ana juaj përse janë ndërmarrë këto veprime dhe nga kanë ardhur të dhënat dhe cili është institucioni që e ka kërkuar këtë prani të forcave policore në selinë e PD-së”, thuhet në letrën e Flamur Nokës.
