Ish-kryeministri Berisha, ka deklaruar në një takim “online” me demokratët në Florida të SHBA-ve se shpallja e tij ‘non grata’ është bërë pa prova dhe fakte.
Ai ritheksoi faktin se shpallja ‘non grata’ është sponsorizuar nga Geroge Soros, pasi ai ka denoncuar planin e shpërbërjes së Kosovës. Berisha vijon më tej duke thënë se vendimet e ndërmarra dje, në Kuvendin Kombëtar, ishin për të shpëtuar statutin dhe konservatorizmin në Shqipëri.
“Shpallja non grata e Sali Berishës është rast unik në botë. Nuk ka asnjë njeri që shpallet non grata 8 vite pasi ka dhënë dorëheqjen nga funksionet drejtues. Nuk ka asnjë njeri në listën e personave të shpallur non grata ndaj të cilit të mos ketë ekzistuar asnjë lloj akuze nga asnjë individ apo institucion, si ndaj atij, ndaj edhe familjes së tij. U shpalla non grata edhe për një arsye tjetër madhore. Pasi partia që unë mbështes humbi zgjedhjet, projekti ishte që kjo parti të shndërrohej në aleate të PS. Këtë unë kurrsesi nuk e pranoja, sepse binte në kundërshtim flagrant me interesat e shqiptarëve. Me politikat e ndjekura të qeverisë aktuale, Shqipëria ka zbritur nga vendi me pagën mestarë më të lartë në rajon, ka zbritur në vendin me pagën mesatare më të ulët në rajon. Këto ishin arsyet se përse unë u shpalla non grata. Si veprova? Unë vendosa t’i drejtohem menjëherë gjykatës dhe hodha në gjyq për shpifje Sekretarin e Shtetit që kishte firmosur vendimin. E mbajta një çështje personale. Kërkova që askush të mos merret me këtë punë, sikundër, natyrisht, fillova një fushatë informimi midis të tjerëve të gjithë ligjvënësve në SHBA me qëllimin e vetëm që është abuzuar rëndë me ligjin e Kongresit. Ky ligj nuk parashikon shpallje non grata pa dokumente. Ata pretendojnë se Sekretari i Shtetit është bazuar nga të dhëna të marra nga OJF në Shqipëri në Evropë. Por ato janë të sponsorizuara nga Soros dhe mediat që janë të kapura nga Rama. A imagjinohet që për fjalë të kundërshtarëve të goditet kështu opozita. SHBA-të nëse do të ushtronin praktikë të tillë do të shkatërronin opozitat demokratike në mbarë botën. Ky nuk është qëllimi i tyre, këto janë qëllime të iniciuara nga multimilioneri Geroge Soros. Në këtë kushte, kur në Shqipëri opozita përfundoi si shtojcë e qeverisë, kur pluralizmi politik ra në agoni, fillova nismën për shpëtimin e PD, për rithemelimin e saj, për sovranitetin e saj”, tha Berisha.
