Policia e Shtetit publikon videon: Ja si babë e bir ekzekutuan biznesmenin e njohur në Laç

Zbardhet atentati i ndodhur në Sanxhak të Laçit një ditë më parë, ku mbeti i vrarë biznesmeni Rakip Roli.

Policia e Shtetit bën me dije se kanë rënë në pranga tre persona, autori dhe dy bashkëpunëtorët në krim.

Të arrestuarit janë S. Lika dhe L. Lika, babë e bir,  si dhe shtetasi me inicialet, K.Gj. Sipas policisë, krimi ka ndodhur për motive të dobëta, dhe personi që ka qëlluar biznesmenin në Sanxhak ka qenë 22-vjeçari Lika.

“Nga tërësia e veprimeve hetimore të kryera nga grupi i posaçëm hetimor, rezultoi se ngjarja ka ndodhur për motive të dobëta dhe se autori i dyshuar i vrasjes së 55- vjeçarit është shtetasi Ll.L., 22 vjeç dhe bashkëpunëtorët babai i tij shtetasi S.L., 56 vjeç dhe shoku i tij shtetasi K.Gj., banues në Kurbin.

Si rezultat i kontrolleve të pandërprera të ushtruara në banesa dhe ambjente të ndryshme, ku dyshohej se mund të fshiheshin autorët, mbi bazën e informacioneve të siguruara në rrugë operative dhe në bashkëpunim të ngushtë me qytetarët, Policia bëri të mundur lokalizimin, kapjen dhe vënien në pranga të autorëve të dyshuar, në Fushë Milot, Kurbin. Sapo kanë konstatuar shërbimet e Policisë kanë tentuar të largohen”, njofton policia.

Gjithashtu, policia ka sekuestruar dhe një armë kallashnikov, me të cilën dyshohet të jetë kryer krimi, si dhe u sekuestrua një mjet tip “Benz ” dhe një motoçikletë, me të cilët dyshohet se lëviznin autorët.