Festat e fundvitit/ A do të shtrëngohen masat nga pandemia? Ja ç´thotë Manastirliu

Pak ditë para festave të fundvitit, të gjithë presin nëse do të shtrëngohen apo jo masat në kuadër të pandemisë.

Kjo pyetje iu drejtua edhe ministres së Shëndetësisë Ogerta Manastirliu.

Ashtu siç pritej, ajo ia hodhi topin Komitetit Teknik të Ekspertëve, të cilët do të vlerësojnë situatën dhe do të propozojnë masat.

Manastirliu shtoi se kufizimet i vendos Komiteti i Ekspertëve duke vlerësuar edhe indikatorët e tjerë të situatës së pandemisë në vendin tonë. Ministrja theksoi se arma që të gjithë kemi në dorë tani është vaksinimi, duke shtuar se situata e imunizimit në vendin tonë është e qëndrueshme. Manastirliu deklaroi se qeveria nuk do të ndalet derisa çdo qytetar të jetë i mbrojtur nga virusi.

“Dua të them që vendimet merren nga komiteti i ekspertëve. Situata po ndiqet në mënyrë dinamike. Duhet të jemi të kujdesshëm për masat duke rivlerësuar masat që kemi, Esenciale është vaksinimi si armë që kemi kundër virusit apo edhe varianteve që qarkullojnë siç është edhe Omircon. Priten informacione nga institucionet ndërkombëtare për të parë sa i rrezikshëm është ai. Vaksina është arma që ne kemi”, tha ajo.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Në fakt, Komiteti Teknik i Ekspertëve, nga momenti kur u ngrit, në fillimet e pandemisë, funksionon jo më si një grup ekspertësh që vlerësojnë masat por si një Komitet Politik, përsa kohë miratohen propozime të hedhura publikisht nga Kryeministri Edi Rama apo ministrja Manastirliu, sikundër ka ndodhur edhe më parë.