Një ditë para protestës së madhe të Opozitës më 8 qershor, kryetari i PD, Lulzim Basha ka dalë në një konferencë për shtyp, ku ka intensifikuar sulmet e tij ndaj mazhorancës.
Duke folur nga “selia blu”, Basha tha se të gjitha ato që po publikohen sot nga mediet ndërkombëtare, PD i ka denoncuar me kohë.
Sipas Bashës, kur ata kanë folur për këto fenomene janë cilësuar si Donkishotë, por koha po tregon se kanë pasur të drejtë.
“Vazhdimi dihet nga të gjithë. Aktiviteti kriminal i drogës evoluon nga ai drogave të lehta në ato të rënda, kokainë dhe heroinë. Evoluon nga niveli lokal në atë rajonal dhe pastaj ndërkombëtar. Pastaj kriminelët me paratë e drogës kapin policinë, drejtësinë dhe politikën. Pikërisht kjo që ka ndodhur në Shqipëri me shpejtësi brenda pak vitesh. Të gjitha këto, unë dhe PD i kemi denoncuar dhe luftuar përditë. Shumë njerëz na kanë marrë për Donkishotë, por sot Donkishotët janë ata që Edi Rama ju dukej artist dhe perëndimor dhe jo ai që është: një kriminel llogaritës dhe manipulator gjakftohtë që ka instaluar në Shqipëri një regjim kriminal”, theksoi Basha.
