1 Dhjetori shënon Ditën Ndërkombëtare kundër HIV/AIDS, e cila kërcënon botën, ndërsa mjekësia vijon punën për të mundësuar zbulimin e ilaçeve dhe metodave efikase për trajtimin e sëmundjes.
AIDS-in e shkakton virusi HIV, që dëmton sistemin imunitar të njeriut, duke e lënë atë të ekspozuar kundrejt infeksioneve të rënda.
Kjo ditë është një mundësi e mirë për të shpërndarë informacion në lidhje me situatën e kësaj pandemie dhe për të inkurajuar përparimin në parandalimin, trajtimin si dhe kujdesin ndaj HIV/AIDS-it në të gjithë botën.
Sipas OKB-së, 37.7 milionë njerëz në mbarë botën ishin me HIV në vitin 2020, ndërsa 680,000 vdiqën nga sëmundjet e lidhura me SIDA-n në të njëjtin vit.
Që nga fillimi i shpërthimit të HIV, rreth 79.3 milionë njerëz janë infektuar me HIV dhe 36.3 milionë kanë vdekur nga sëmundjet e lidhura me SIDA-n.
