LIGJET E BIZNESIT
Dalin detaje të reja nga plagosja që tronditi mbrëmjen e sotme qytetin e Shkodrës.
Mësohet se është qëlluar pas shpine 64 vjeçari Pashko Ujka, i cili ka mbajtur më parë postin e kryetarit të Komunës së Velipojës.
Ai u godit me një plumb menjëherë sapo doli nga banesa.
Ngjarja ndodhi në lagjen “Vasil Shanto” pranë qendrës së Shkodrës.
Mësohet se autorët kanë qëlluar me një armë zjarri pistoletë me silenciator.
Ujka ka marrë një plagë plumbi në kurriz dhe është dërguar menjëherë në spital.
Gjendja e tij shëndetësore nuk dihet ende.
Pashko Ujka më herët ka qenë deputet i Partisë Demokristiane përgjatë legjislaturës në vitet 2005-2009, i zgjedhur në Shkodër. Nga viti 2011 e deri në 2015, ai ka qenë kryetar i Komunës së Velipojës.
Ujka është kërcënuar edhe herë të tjera, pasi drejt banesës së tij është qëlluar me armë zjarri.
NJOFTIMI ZYRTAR I POLICISE
Rreth orës 18:15, në lagjen “Vasil Shanto” Shkodër, në rrethana ende të paqarta është plagosur me armë zjarri shtetasi P. U., 64 vjeç, i cili ndodhet në spital nën kujdesin e mjekëve.
Në vendngjarje kanë mbërritur menjëherë shërbimet e Policisë dhe vijon krehja e zonës me qëllim kapjen e autorit. Grupi hetimor nën drejtimin e Prokurorisë po vijon punën për sqarimin e rrethanave dhe zbardhjen e ngjarjes.
