LIGJET E BIZNESIT
Konsumatorët shqiptarë pritet të përfitojnë më shumë mbrojtje në treg, si në blerjet fizike, ashtu edhe në ato online. Projektligji “Për mbrojtjen e konsumatorëve”, i depozituar për diskutim në komisionet parlamentare, parashikon detyrime më të qarta për bizneset dhe zgjerimin e të drejtave të qytetarëve në marrëdhëniet tregtare.
Nisma synon përafrimin e legjislacionit shqiptar me standardet e Bashkimit Evropian, duke synuar një treg më transparent dhe të drejtë, ku konsumatorët të kenë informacion të plotë përpara se të marrin vendime për blerjet e tyre.
Një nga risitë kryesore lidhet me transparencën e çmimeve dhe ofertave promocionale. Sipas projektligjit, çmimi i shitjes duhet të jetë i shënuar qartë për çdo produkt, ndërsa në rastet e uljeve duhet të bëhet i ditur çmimi pararendës më i ulët i aplikuar gjatë 30 ditëve të fundit. Kjo masë synon të parandalojë ofertat mashtruese dhe uljet artificiale të çmimeve.
Projektligji zgjeron gjithashtu detyrimet e bizneseve për informimin e konsumatorëve. Tregtarët duhet të japin të dhëna të qarta për karakteristikat, origjinën, cilësinë, çmimin, afatin dhe mënyrën e përdorimit, si dhe për garancinë e produkteve. Informacioni tregtar në gjuhën shqipe parashikohet si kërkesë bazë, ndërsa përgjegjësia për sigurinë përfshin edhe shërbimet. Rregulla të veçanta parashikohen për shitjet në distancë, përmes internetit, telefonit apo jashtë ambienteve tregtare. Në këto raste, tregtari do të duhet të informojë konsumatorin për identitetin e tij, çmimin e plotë, kostot shtesë dhe kushtet e garancisë ligjore e tregtare.
Konsumatorët do të ruajnë gjithashtu të drejtën për t’u tërhequr nga kontratat e lidhura në distancë ose jashtë ambienteve tregtare brenda 14 ditëve, pa dhënë arsye. Në rastet kur tregtari nuk i informon për këtë të drejtë, afati mund të zgjatet deri në 12 muaj. Kostot e kthimit të mallrave mund t’i mbeten konsumatorit, nëse nuk mbulohen nga tregtari.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Një tjetër ndryshim lidhet me forcimin e mekanizmave për trajtimin e ankesave. Projektligji parashikon që tregtarët të pranojnë ankesa me shkrim, fizikisht ose elektronikisht, të konfirmojnë marrjen e tyre dhe të japin përgjigje brenda 15 ditëve kalendarike. Gjithashtu, ata do të duhet të mbajnë regjistrin e ankesave për një vit nga data e marrjes.
Përgjegjshmëria e bizneseve synohet të rritet edhe përmes detyrimit për të lëshuar kuponin ose faturën tatimore për çdo shitje. Po ashtu, mallrat duhet të ambalazhohen ose paketohen në mënyrë të rregullt dhe të sigurt.
Projektligji synon të forcojë zbatimin praktik të të drejtave të konsumatorëve dhe të vendosë standarde më të qarta për mënyrën se si bizneset ofrojnë produktet dhe shërbimet në tregun shqiptar.
