LIGJET E BIZNESIT
Një dorëshkrim i Albert Einsteinit, i cili ofron një pasqyrë të rrallë të të menduarit të fizikanit legjendar që dërgoi në teorinë e përgjithshme të relativitetit, u shit në një ankand të martën për 11.7 milionë euro.
Shtëpia e ankandeve Christie’s e kishte vlerësuar vlerën e dorëshkrimit midis 2-3 milionë eurove, raporton cnn.
Dorëshkrime prej 54 faqeve, rreth gjysma të shkruara nga dora e Einsteinit, janë një nga vetëm dy dokumentet e njohura, në të cilat mendimtari hodhi themelet për kozmologjinë dhe teknologjinë moderne, siç është navigimi i sistemit të pozicionimit global (GPS).
Ato ishin mbajtur nga fizikanti zviceran, Michele Besso, një mik i ngushtë dhe partner akademik i Einsteinit, i cili ishte bashkë-autor i veprës midis viteve 1913 dhe 1914, transmeton Telegrafi.
“Kjo është ajo që e bën atë të rëndësishëm duke pasur parasysh se dokumentet e punës së Einsteinit para vitit 1919 janë jashtëzakonisht të rralla”, tha Vincent Belloy, një ekspert në Christie’s që organizoi ankandin në Paris.
“Einsteini është njeriu që mbante shumë pak shënime. Fakti që dorëshkrimi mbijetoi dhe arriti te ne tashmë e bën atë absolutisht të jashtëzakonshëm”, shtoi ai.
I përbërë kryesisht nga llogaritje të pafundme me bojë të zezë në letër të rrudhosur, dorëshkrimi sfidon imazhin popullor të fizikantit si një gjeni absolut, sepse tregon se edhe ai – të paktën ndonjëherë – bëri gabime.
Në muajin maj, një letër e shkruar me dorë, në të cilën Einsteini përmendi ekuacionin e famshëm E=mc², një pjesë e teorisë së tij të mëparshme të relativitetit, u shit me afërsisht një milion euro në Shtetet e Bashkuara, më shumë se trefishi i çmimit të vlerësuar.
Me teorinë e përgjithshme të relativitetit që u botua në vitin 1915, Einsteini revolucionarizoi fizikën moderne kur për herë të parë e përshkroi gravitacionin si një shtrembërim gjeometrik të hapësirës dhe kohës, një zbulim që mbetet i vlefshëm. Christie’s nuk e zbuloi emrin e blerësit. /Telegrafi/
