Ibrahimaj thirrje bizneseve: Dokumentoni dëmet nga protesta

Ministrja e Ekonomisë, Delina Ibrahimaj, ka shkuar në zonën e Zogut të Zi në Tiranë për të parë nga afër dëmet e shkaktuara ndaj bizneseve gjatë protestave të ditëve të fundit. Në një reagim nga terreni, Ibrahimaj u shpreh se nuk janë studentët ata që duan të shkatërrojnë qytetin dhe dëmin e shkaktuar ndaj bizneseve e cilësoi si veprim të qëllimshëm nga persona që, sipas saj, nuk duan përparimin e Shqipërisë.

Ministrja ngriti gjithashtu pretendimin se pas këtyre akteve qëndrojnë interesa të huaja, të cilat, sipas saj, synojnë të pengojnë integrimin evropian të vendit. Ibrahimaj u bëri thirrje bizneseve të prekura që të dokumentojnë dëmet e pësuara, me qëllim që Ministria e Ekonomisë dhe organet e drejtësisë të ndërmarrin veprimet përkatëse.

“Unë u bëj thirrje të gjithë bizneseve të dokumentojnë dëmin që iu është bërë, me qëllim që Ministria e Ekonomisë, por edhe organet e drejtësisë, të bëjnë detyrën e tyre dhe ta adresojnë të gjithë atë dëm që i është bërë bizneseve”, deklaroi ministrja. Reagimi vjen në një kohë kur protestat në kryeqytet janë shoqëruar me dëmtime të bizneseve dhe objekteve të ndryshme, duke rikthyer në vëmendje pasojat ekonomike të akteve të dhunës dhe nevojën për garantimin e sigurisë së aktivitetit tregtar.

Reagimi i plotë:

“Kam ardhur tek Zogu i Zi për të dokumentuar dhe për të parë nga afër dëmin që i është bërë bizneseve nga protestat. Nuk janë studentët ata që duant të shkatërrojnë qytetin. Nuk janë studentët ata që duan që mundi dhe djersa e prindërve, e shokëve dhe e shoqeve të tyre të dëmtohet dhe të shkatërrohet.

Është e njëjta dorë që ka dashur që Shqipëria ta lërë mbrapa, është e njëjta dorë që ka shkatërruar shumë herë vendin, por kësaj radhe, ndryshe nga herët e tjera, mentimamt e huaja të cilat nuk duan që Shqipëria të futet në Bashkimin Evropian, nuk duan që Shqipëria të përparojë. Unë u bëj thirrje të gjithë bizneseve të dokumentojnë dëmin që iu është bërë, me qëllim që Ministria e Ekonomisë por edhe organet e drejtësisë të bëjnë detyrën e tyre dhe ta adresojnë të gjithë atë dëm që I është bërë bizneseve nga një dorë e pabesë e cila do ta shohë Shqipërinë të shkatërruar.”

https://www.facebook.com/reel/4460231454237133