Ministri i Bujqësisë dhe Zhvillimit Rural Bledi Çuçi ka komentuar përgjimet e publikuara të gazetës gjermane “Bild” duke i quajtur si biseda normale që ndodhin në të gjithë botën.
I ftuar në studion e “Opinion” në televizionin News 24, Çuçi tha të gjithë politikanët në botë komunikojnë me shumë njerëz gjatë fushatës elektorale.
Janë biseda që rëndom në periudha fushatash bëhen jo vetëm në Shqipëri por në gjithë botën. Nuk është se ka ndonjë…ai ishte i lirë në momentin që janë bërë përgjimet. Ai ishte një njeri i lirë që nuk ishte i proceduar nga organet ligjzbatuese.
Nuk e di a është ai që u arrestua dhe u la i lirë. Kjo është një ngjarje që ka ndodhur më vonë nga përgjimet. Duhet t’i vëmë edhe ngjarjet në kronologji. E ka arrestuar po kjo polici, po kjo qeveri por ta marrim si çështje që ka të bëjë me favorizime. Nga kjo pikëpamje nuk shoh asgjë të çuditshme. Dihej fabula sepse nga kjo dosje kanë dalë dhe përgjime të tjera. Publiku besoj e ka marrë, i ka dëgjuar dhe është bindur se aty nuk ka asgjë të jashtëzakonshme nga zakoni jo i zakonshëm i politikës shqiptare. Por prapë them se çdo politikan në gjithë botën komunikon me të gjithë. Edhe po të ishte i arrestuar prapë legjitimohet që politikani t’i kërkojë votën’, u shpreh Çuçi.
