Pezullohet qarkullimi i mjeteve/ Çfarë po ndodh në Dibër? Hapet një gropë 10 metra e thellë

Aksi rrugor Dibër-Mavrovë është mbyllur rreth orës 8 të mëngjesit të sotëm, te “Kosovrasti” në Maqedoninë e Veriut.

Sipas LAMM, ky vendim u mor pasi është hapur një gropë me thellësi prej 10 metrave, ndërkaq komunikacioni për në Dibër po zhvillohet përmes Strugës.

Nga LAMM thonë se trafiku në rrugët shtetërore mëngjesin e sotëm po zhvillohet në rrugë me lagështi, me intensitet të moderuar në rrugët jashtë zonave urbane.

Në pikat kufitare, nga ana e Maqedonisë së Veriut, nuk ka vonesa për hyrje dhe dalje nga vendi.

Lidhja Auto Moto e Maqedonisë rekomandon rregullimin e shpejtësisë, respektimin e sinjaleve të vendosura në trafik dhe menaxhimin e kujdesshëm të automjeteve, veçanërisht në rrugët nëpër lugina, luginat e lumenjve dhe grykat, ku ekziston mundësia e rrëshqitjes së dheut.

Kjo veçanërisht i referohet seksioneve Katlanovë – Veles, Mavrovo – Dibër – Strugë, Vinicë – Berovë dhe Koçani – Delçevë.