Kjo fundjavë do të paraqitet e freskët për shkak të qarkullimit të masave ajrore nga veriu, verilindja të cilat do të sjellin rënie të ndjeshme të temperaturave të ajrit në vendin tonë, duke bërë që termometri në vlerat minimale të zbresë në tre apo në katër gradë celcius, ndërsa maksimumi në territorin shqiptar parashikohet jo më shumë se 23 gradë celcius.
Gjithashtu kushtet e motit do të paraqiten të paqëndrueshme pasi kjo fundjavë do të paraqitet nën ndikimin e vranësirave të shpeshta, të cilat herë pas here do të sjellin zhvillim dhe rrebeshe afatshkurtra shiu ku gjatë ditës së sotme priten rrebeshe të shkurtra në zonat jugperëndimore ndërsa pjesa tjetër e territorit do të ketë reshje të pakta.
Edhe dita e shtunë dhe dita e diel mbeten nën ndikimin e vranësirave të shpeshta të cilat do të sjellin reshje të pakta dhe të izoluara shiu.
Era herë pas here do të paraqitet problematike pasi në det të hapur do të fitojë shpejtësi duke arritur 45 apo 50 km/h duke shkaktuar dallgëzim të trazuar.
