Java ka nisur me kushte të qendrueshme atmosferike duke bërë që moti të jetë i kthjellët në pjesën më të madhe të territorit.
Vranësirat do të shfaqen në orët e pasdites.
Parashikohet që dita e martë të ketë vranësira më të dukshme, ku nuk përjashtohen edhe reshje të pakta në ekstremin juglindor.
Duke filluar që nga pjesa e dytë e ditës së mërkurë, presim një sistem të mirëfilltë vranësirash i cili do të zhvendoset në territorin shqiptar duke sjellë dhe reshje në orët e vona të mbrëmjes, reshje intensive, kryesisht në zonat veri-veriperëndimore dhe gradualisht do të përfshijë të gjithë territorin.
Po ashtu dita e enjte dhe orët e paradites së ditës së premte do të mbeten nën ndikimin e reshjeve me intensitet mesatar dhe lokalisht intensive.
Gjatë kësaj kohe do të kemi dhe forcim të ndjeshem të parametrit të erës duke bërë që shirat të shoqerohen dhe me stuhi të forta ere, sidomos në zonat bregdetare duke bërë që era të jetë dhe mbi 65 km/h.
Përsa i përket ditës së premte dhe fundjavës presim dobësim të ndjeshëm të reshjeve, duke bërë që të jenë të pranishme por në sasi krejt të pakta.
Parashikohet që në fundjavë te kemi herë pas here intervale me kthjellime.
Temperaturat e ajrit mbeten të larta deri në mesin e javës ku maksimalja në rang territori shkon edhe në 28 gradë.
Duke filluar që nga dita e enjte dhe deri në fund të javës do të ketë rënie të ndjeshme të temperaturave, duke bërë që termometri të zbresë në 21 gradë celcius.
Fundjava do të sjellë një rritje të lehtë të tyre.
Duke qenë se temperaturat minimale do të kenë rënie, do të shfaqen dhe reshje dëbore në majat më të larta të maleve./ Fast News Albania
