Problemet me barkun, si të përdorni disa trajtime natyrale

Në një fazë të jetës, me siguri të gjithë kanë patur probleme me barkun. Disa nga simptomat më të përhapura janë fryrje, kriza të muskujve të barkut dhe në raste më serioze diarre e vazhdueshme.

Problemet me barkun zakonisht nënkuptojnë se organizmi po kalon në një shqetësim të sistemit gastrointensinal apo tretës. Shkaqet e këtyre shqetësimeve janë të ndryshme, duke filluar që nga virozat e stinës, infeksionet bakteriale apo përdorimi i antibiotikëve.

Për këto probleme, ka disa metoda efektive që ndihmojnë në normalizimin e simptomave.

Hidratimi
Një nga pasojat që shkaktojnë problemet me barkun, është edhe dehidratimi i cili në disa raste është fatale. Prandaj është mjaft e rëndësishme që të konsumohen lëngje natyrale dhe ujë. Duhen shmangur aklooli, qumështi dhe pijet me kafeinë, pasi mund të përkeqësojnë simptomat.

Ushqimet që duhen konsumuar
Ushqimet që ndihmojnë në kontrollimin e simptomave të problemeve me barkun përfshijnë: bananet, orizin, pure molle dhe bukë të thekur. Këto ushqime mundësojnë që shëndeti i organeve të sistemit tretës të mos përkeqësohet. Mund të konsumoni edhe: tërshërë, patate të zjera apo të pjekura pa lëkurë, mish pule e pjekur pa lëkurë dhe supë pule.

Ushqimet që duhet të shmangni
Ushqimet e skuqura apo me yndyrë ndikojnë në përkeqësimin e simptomave të problemeve me barkun. Këshillohet që të mos konsumoni as ushqime me nivel të lartë fibrash. Këtu përmendim frutat dhe perimet pasi ndikojnë në fryrjen e stomakut. Po ashtu, ushqime të tjera që duhen shmangur janë: alkooli, bishtajorët, brokoli, lakra e gjallë, lulelakra, misri, qiqrat, akullorja, kumbullat, çaji e qumështi. Mirëpo, nëse simptomat zgjasin për një kohë të gjatë, është e këshillueshme që të konsultoheni me mjekët e fushës për trajtime më të forta.