Pas disa apelimeve të nënkuptuar, kryeministri i Kosovës, Ramush Haradinaj, ka kërkuar që Shqipëria ta heqë taksën në “Rrugën e Kombit”. Deklaratën Haradinaj e bëri gjatë një interviste në televizionin publik kosovar, RTK.
“E lus presidentin t’i kërkojë Edi Ramës t’ia nisë prej hapit të parë. Ta heqë taksën, skanerin. T’ia nisim kështu bashkimin. Unë jam për një bashkim konkret e jo të fjalëve të mëdha. I kisha lutur të gjithë të bëjmë kujdes: Që të mos shkojnë fjalët para punëve”, ka thënë Haradinaj në televizionin publik.
Por ajo që bie në sy në këtë kërkesë të Haradinajt është se ai i drejtohet presidentit Meta që t’i kërkojë kryeministrit Rama për ta hequr këtë taksë. Kjo konfirmon edhe një herë raportin e ngrirë mes dy kryeministrave shqiptar pas Samitit të Berlinit, ku të dy shkëmbyen replika në distancë.
Në mediet të ndryshme ka pasur aludime se nëse Shqipëria nuk ndryshon kurs në sjelljen e saj ndaj Kosovës, atëherë Prishtina mund të marrë të njëjtin vendim, si ai që mori me Serbinë për vendosjen e taksës 100% të mallrave serbe.
