LIGJET E BIZNESIT
Sot në mbrëmje, në orën 21:30 rikthehet në ekran “A2 Business”, programi kryesor i ekonomisë në mediat shqiptare.
Risi në sezonin e tretë do të jetë kohëzgjatja e emisionit, që tashmë është 1 orë e 30 minuta.
Nën drejtimin e producentes ekzekutive për biznesin në “A2 CNN” Aurora Sulçe, njëkohësisht dhe gazetare me mbi 20 vjet eksperiencë, në studio do të trajtohen çështjet kryesore të aktualitetit ekonomik, nga vendi, rajoni dhe bota.
Pjesë e pa ndarë e panelit ku do të sjellin dhe analizat më të mira do të jenë dhe ekspertët më të mirë të ekonomisë dhe financave, akademikë, përfaqësuesit e biznesit, drejtuesit e institucioneve shtetërore dhe institucioneve financiare ndërkombëtare, si FMN, Banka Botërore, BERZH etj.
Emisioni, i zhvilluar në formën e një debati, me një numër të madh të ftuarish sjell këndvështrime të ndryshme lidhur me temën që diskutohet, në mënyrë që teleshikuesi të marrë informacionin e plotë dhe të krijojë opinionin e tij për çështjen në fjalë.
Pjesë e pandarë dhe shumë e rëndësishme e A2 Business janë statistikat dhe të dhënat. Ekipi i gazetarëve investigon dhe nxjerr të dhëna të krahasueshme në vite dhe i sjell ato për shikuesin në formën e grafikëve dhe tabelave, me qëllim që edhe vizualisht gjithçka të jetë lehtësisht e perceptueshme.
Në emision bëhen pyetjet e duhura, ato që shqetësojnë qytetarët, në mënyrë të drejtpërdrejtë dhe të qartë. Kontrata e vetme është me publikun dhe gjithçka që përbën interes dhe shqetësim për të, duke filluar nga aktualiteti ekonomik, investigimet, deri tek informimi mbi risitë në tregje të ndryshme apo industri të caktuara. Mënyrat sesi gjenerohet paraja dhe si investohet ajo, evidentimi i risqeve dhe normave të përfitimit. Sepse A2 Business është emisioni i ekonomisë i të gjithëve dhe për ekonominë ka shumë për të folur!
