“Ndodhemi përballë dy sfidave” Luljeta Bozo hap seancën e parë të Kuvendit: Ndihem e emocionuar si kurrë më parë

Inxhinierja e njohur Luljeta Bozo ka hapur seancën e parë të legjislaturës së 10 parlamentare, si deputetja më e vjetër në moshë e Kuvendit.

Ajo është zgjedhur për herë të parë deputete e PS, ku gjatë fjalës së saj theksoi se kjo legjislaturë do të mbahet mend gjatë për shkak të numrit të lartë të grave dhe vajzave.

Gjithashtu Bozo i ka kërkuar të gjithë deputetëve socialistë e demokratë të punojnë pa ngjyra partiake.

FJALA NGA LULJETA BOZO:

Pas një karrierë të gjatë profesionale, kam nderin të hap legjislaturën e 10 parlamentare. Ndihem e emocionuar pasi kurrë më parë kjo sallë e nderuar s’ka pasur kaq shumë vajza e gra në radhët e saj.

Jam jo vetëm krenare për këto arritje, por kam bindjen e thellë se kjo legjislaturë do të mbahet mend gjatë për thyerjen e barrierave e stereotipieve gjinore, forcimin e rolit të gruas.

Kemi marrë përgjegjësi të madhe, për misionin historik, për ta çuar Shqipërinë drejt Evropës. Për të krijuar një Shqipëri që brezat që vijnë ta adhurojnë.

Mbështetës potenciale në këto reforma mbeten SHBA, aleati ynë më i fuqishëm, BE etj. Na besuan për të çuar drejtësinë përpara, administratën, për aq sa mundemi çështjen e pronave, arsimin, shëndetësinë, ekonominë në të gjitha degët e saj, bujqësisë, energjetikë, arti dhe kultura, pa hequr vëmendjen.

Sot Shqipëria nuk është më shprehje gjeografike. Shtëpia jonë e përbashkët është strehë e mirë për këdo.

Ne vijojmë të ndodhemi para dy sfidave që kanë të bëjnë me rimëkëmbjen, tërmetin e pandeminë. Ne të gjithë së bashku do ia dalim. Zonja e zotërinj. Populli na zgjodhi me votën e tij, të punojmë pa parë ngjyra partiake. të kryejmë me sukses punën e nderuar të deputetit. Paçim punë të mbarë të gjithë, të majtë e të djathtë. Ne punojmë për të mirën e vendin tonë. Në këtë proces do të kemi mbështetjen e shqiptarëve. Punë të mbarë të gjithëve.