Zbardhet vendimi, ja sa do të qendrojnë afganët në Shqipëri

Afganët që do të vinë në Shqipëri do të qendrojnë për të paktën një vit.

Fakti bëhet i ditur në vendimin e sotëm të qeverisë, ku mësohet se është ngritur dhe një task-forcë që do të merret me këtë çështje aq të përfolur kohët e fundit.

Në mbledhjen e fundit, kabineti qeveritar Rama 2 miratoi ngritjen e kësaj task force që do të përbehet nga shtatë Ministri dhe do të kryesohet nga dikasteri për punët e Jashtme.

Ky është vendimi i parë që shteti shqiptar ndërmarr pas deklaratave publike dhe parashikon dhënien e mbrojtjes së përkohshme ndaj afganëve.

Me këtë status, afganët do të kenë të drejtë të qëndrojnë për 1 vit në Shqipëri, ndërsa Qeveria i njeh vetes të drejtën të kufizojë lëvizjet e tyre nëse do t’i nevojitet.

Prej më shumë se dy javësh, shteti shqiptar është angazhuar të presë një numër prej rreth 3 mijë refugjatësh nga Afganistani që pritet të qëndrojnë në Tiranë, Durrës dhe Berat.