Zjarr i madh në Berat/ Flakët ‘përpijnë’ hektarë me shkurre dhe pemë, ja çfarë dyshojnë banorët

Një zjarr i madh ka rënë sot në mbrëmje në fshatin Lapardha 2 të Beratit.

Flakët janë përhapur me shpejtësi, të favorizuara dhe nga era.

Gjithashtu zjarri ka përfshirë disa hektarë me shkurre, ferra e pemë frutore.

Fatmirësisht forcat zjarrëfikës kanë mbërritur në kohë rekord, pas njoftimit të marrë nga banorët, duke mundur të lokalizojnë dhe të fikin flakët e zjarrit që po i afroheshin banesave

Në rrezik nga zjarri ishin rreth 10 shtëpi të fshatit Lapardha 2, që ndodheshin jo më shumë se 50 metër nga vatra e zjarrit. Banorët deklarojnë se zjarri ka qenë i qëllimshëm dhe i vënë nga dora e njeriut.

“Zjarri nuk merr vetë, e ka vënë dikush. Po ta kisha gjetur këtu do ta hidhja nga zjarr”-, shprehet njëri prej banorëve që ju rrezikua banesa.

Në vendngjarje kanë shkuar edhe forcat e policisë, që po punojnë për identifikimin dhe kapjen e autorëve të kësaj zjarrëvënie të qëllimshme. Si pasojë e zjarrit janë shkrumbuar rreth 2 ha me shkurre, ferra e pemë frutore.