LIGJET E BIZNESIT
Ditën e sotme kryeministri i Greqisë ka njoftuar për një paketë ndihme financiare me vlerë 500 milionë euro për të prekurit nga zjarret në rajonet Atikë dhe Evi.
Ai bëri me dije se paratë do të shpërndahen drejtpërdejtë, me anë të procedurave dixhitale dhe pa burokraci.
Në të njëjtën kohë, ai njoftoi nisjen e një programi të veçantë rindërtimi për Evia-n.
Kryeministri kërkoi personalisht falje për dobësitë, ndërsa premtoi se dështimet do të identifikohen dhe përgjegjësitë do të atribuohen.
“Ditët e fundit kanë qenë një nga më të vështirat për vendin tonë, në dekada të tëra. Kemi dhënë dhe ende do të japim për të fituar betejën me gjithë fuqinë tonë. Po përballemi me një fatkeqësi natyrore me përmasa të pashembullta: brenda pak ditësh, 586 zjarre shpërthyen në të gjitha skajet e Greqisë. Me zjarret të cilët, për shkak të nxehtësisë së paparë dhe thatësirës shumë mujore, tani janë shumë të vështira për t’u shuar”, tha kreu i qeverisë.
“Fakti që njerëzit u shpëtuan, me plane evakuimi të plota, i detyrohet profesionalizmit të Mbrojtjes Civile, veprimit të Policisë dhe Rojeve Bregdetare. Në më pak se 24 orë, u bënë 62 evakuime të organizuara të banorëve në 141 zona”, shprehet ai.
Mitsotakis ka bërë një bilanc të punës së tij, duke u shprehur se si kryeministër në 25 muaj ka përballuar shumë kriza, nga ajo e refugjatëve te pandemia e Covid-19, të cilat dukeshin të pakapërcyeshme në fillim, por sipas tij u tejkaluan me këmbëngulje dhe unitet.
“Kjo do të ndodhë edhe tani, me vendime të guximshme që do të ndryshojnë shumë gjëra. Jam i sigurt se ky test do të jetë gjithashtu një mundësi që do të na mësojë dhe do të na bëjë më të mirë. Sepse sfida e krizës klimatike nuk ka të bëjë vetëm me gjeneratën tonë, por veçanërisht me brezin e ardhshëm”, tha kryeministri grek.
