Zbardhen detaje të tjera nga plani i dështuar i arratisjes nga burgu “313” i Arbër Çekajt dhe Fatmir Pjetrit.
Mësohet se i burgosuri i tretë që i ndihmoi ata për tu arratisur është Lulzim Çepele, i dënuar për “Shfrytëzim prostitucioni”.
Çepele mësohet se preu damarët e dorës për të shpërqendruar gardianët.
HETIMI
Shërbimi i Çështjes së Brendshme të Burgjeve, menjëherë pas ngjarjes së rëndë që duket se në një farë mënyrë cenoi sigurinë e Burgut të Sigurisë së Lartë, ka nisur hetimet për të mësuar nëse dy të dënuarit kanë bashkëpunuar me ndonjë punonjës të administratës së burgut. Megjithatë deri tani është mësuar vetëm për një bashkëpunëtor, që nuk i përket administratës, por është edhe ai i dënuar. Por, hetimet do të vazhdojnë me imtësi, për të mësuar më shumë detaje rreth ngjarjes, bashkëpunëtorëve dhe planit të dy të dënuarve.
TENTATIVA E ARRATISJES
Tentativa e arratisjes nga burgun i sigurisë së lartë “313”, në Tiranë, ndodhi dje në mes të ditës. Arbër Çekaj dhe Fatmir Pjetri, njëri i dënuar për drogë e tjetri për grabitje, kanë shfrytëzuar orarin e ajrimit për të organizuar këtë tentativë, duke përdorur çarçafë si litarë të improvizuar.
Burime nga Drejtoria e Burgjeve thanë dhe se qëllimi i tyre ka qenë mbërritja në zonën që përdoret si hyrje nga ana e punonjësve të administratës së burgut.
Gjithsesi ata janë kapur në flagrancë nga autoritetet e vuajtje së dënimit dhe ndaj tyre do të konsiderohet masa të mëtejshme ndëshkimore. Megjithatë, gjatë kohës që po i ndalonin, dy të dënuarit nuk janë bindur lehtë, duke goditur një punonjës të sigurisë, i cili është dërguar për të marrë ndihmën e nevojshme.
Ndërsa mësohet se për planin e tyre të arratisjes, ata janë ndihmuar nga një i dënuar tjetër, i cili për të tërhequr vëmendjen e gardianëve ka tentuar të presë damarët.
Dy të dënuarit janë marrë në pyetje për të mësuar më shumë për veprimet e tyre, apo nëse kanë pasur ndonjë bashkëpunëtor nga administrata e burgut.
Drejtoria e Përgjithshme e Burgjeve ka dhënë detaje rreth tentativës për arratisje të Arbër Çekajt, i dënuar për kokainë dhe Fatmir Pjetrit, pjesë e bandës së grabitësve që u ekstradua nga Gjermania. Ata kanë bashkëpunuar me njëri-tjetrin dhe para përpjekjes për tu larguar me çarçafë, kanë përdorur një të paraburgosur tjetër, i cili ka tentuar të presë damarët e dorës, duke tërhequr kështu vëmendjen e forcave të sigurisë të cilat po merrnin masa për ta shoqëruar në spital për të marrë shërbimin e duhur shëndetësor. Sipas njoftimit zyrtar, rreth orës 15:15, Çekaj dhe Pjetri kanë tentuar që të kryejnë arratisjen gjatë orarit të ajrimit, por janë pikasur nga punonjësit e policisë së burgut 313, të cilët kanë marrë masat e duhura të menjëhershme për kapjen dhe neutralizimin e tyre. Gjatë tentativës për t’ia mbathur, ata kanë goditur dhe një prej policëve të burgut “313”, i cili është dërguar për marrjen e ndihmës shëndetësore.
