Kush dëshiron të shkojë në Gjermani duke filluar nga sot duhet të ketë parasysh këtë gjë

Në datën 1 gusht hyri në fuqi detyrimi i testit për të kthyerit nga pushimet, masë kjo që u mor për të penguar përhapjen e virusit në fund të pushimeve të verës.

Personat nga mosha 12-vjeçare duhet të paraqesin para hyrjes në Gjermani testin negativ, vërtetimin e vaksinimit apo të shërimit nga virusi.

Ky rregull vlente deri më tani për pasagjerët ajrorë, mirëpo tani vlen për të gjitha rrugët e hyrjes në Gjermani, me automjet, autobus apo edhe tren. Kontrollet do të shtrihen edhe të gjerë.

Ndërkohë në Gjermani po debatohet ashpër për ndalimin e testimit falas për personat që nuk janë vaksinuar. Pavarësisht se qeveria gjermane ka deklaruar, se testet falas aktualisht do të vazhdojnë.

Ministria gjermane e Shëndetësisë në një prononcim për mediat tha se, “ministri gjerman i Shëndetësisë, Jens Spahn ka thënë para javësh, se e quan të mundur, që të mos ofrohen më falas testet për të pavaksinuarit në një kohë të mëvonshme. Se kur është ky afat mbetet të përcaktohet.”

Mirëpo, sipas qarqeve qeveritare, ende nuk ka ujdi, nëse nga fundi i muajit shtator nuk do të ofrohen më testet falas për të pavaksinuarit.