Gazeta greke “Protothema” shkruan se hetuesit kanë informacione të mjaftueshme që dokumentojnë se vrasësi i 20-vjeçares britanike Caroline në sy të foshnjës është burri i saj, piloti 32-vjeçar Charalambos Anagnostopoulos. Provat bazohen nga analiza me ndihmën e teknologjisë e të dhënave të celularëve të çiftit dhe ora biometrike e viktimës.
“Charalambos Anagnostopoulos, burri i 20-vjeçares Caroline Krauts sipas provave në dispozicion të policisë dhe që konsiderohen të mjaftueshme është vrasësi i saj. Përmbysja e hetimeve e sjell pilotin nga pozicioni i burrit dhe babait të shkatërruar në pozicionin e të akuzuarit për një nga rastet më famëkeqe të vrasjeve të viteve të fundit.
Të dhënat që sipas policisë vërtetojnë fajësinë e pilotit 32-vjeçar vijnë kryesisht nga analiza me ndihmën e teknologjisë së të dhënave nga kamera, celularët e çiftit, por edhe ora biometrike e 20-vjeçares që tregoi kohën reale të vdekjes e cila nuk përkonte me atë që kishte dëshmuar Babis Anagnostopulos” shkruan gazeta greke.
Një ditë më parë, hetimet morën një kthesë të fortë, kur policia duke pasur të dhënat e reja në dispozicion, i kërkoi Babis Anagnostopulos kthimin në Athinë nga Alonissos për të dëshmuar.
Për të mos treguar se sa serioze ishin këto fakte si dhe për mos e “trembur”, ata pranuan kërkesën e tij për të qëndruar një ditë tjetër në Alonissos, në mënyrë që të ishte i pranishëm në shërbimin përkujtimor për vajzën.
Pas shërbimit përkujtimor, piloti u mor me helikopter dhe u dërgua në Athinë. Prej atij momenti, ai dëshmoi, por përgjigjet e tij nuk ishin bindëse në lidhje me provat e mjaftueshme që e “gozhdojnë” për vrasjen e të resë.