Situatë e tensionuar mes socialistëve/ Dritan Leli nuk i priti dje në mbledhje, anëtarët e Këshillit Bashkiak bëjnë lëvizjen urgjente

Pas përplasjes në distancë dje me kryetarin e Bashkisë Dritan Leli, anëtarët e Këshillit Bashkiak të Vlorës nuk janë dorëzuar.

Ata kanë bërë lëvizjen e rradhës, duke kërkuar ballafaqim me Lelin për punën që ai ka bërë në krye të këtij institucioni.

Në një shkresë ku i drejtohen për mbledhje urgjente, kryetares së këshillit Bashkiak Migena Balla, këshilltarët e Vlorës të kryesuar nga Anduel Tahiraj propozojnë një tjetër mbledhje në ambientet e Teatrit ‘Petro Marko’, në datën 22 Qershor, pra javën e ardhshme.

Refuzimi i Lelit për të pasur një mbledhje fizikisht me këshilltarët është bërë për shkak të respektimit të rregullave anticovid, të vendosura nga vetë komiteti i ekspertëve.

Përveç kërkesës për shqetësimet mbi punët e Bashkisë, këshilltarët tashmë kërkojnë transparencë dhe mbi vendimin e Lelit, për të mos bërë mbledhje me ta gjatë ditës së djeshme, duke u shmangur sipas tyre nga një përballje.