Ish-deputeti i Kuvendit Eduart Ndocaj kandidon në zgjedhjet vendore të 30 qershorit si i pavarur për Bashkinë e Lezhës.
Në një video të postuar në rrjetet sociale ai sulmon dy figurat e PS, rivalin e tij kandidat për të njëjtën bashki Pjerin Ndreu si dhe kryetaren e Partisë Socialiste Lezhë, Lindita Buxheli.
Gjatë videos Ndocaj i bën thirrje qytetarëve të Lezhës të mos ta shesin votën, dhe nëse do të ketë raste që ata do korruptohen të mos pranojnë.
Por nga ana tjetër ai ka një ofertë mjaft interesante për zgjedhësit që mund t’ju ofrohet blerja e votës.
Eduart Ndocaj propozon se nëse zgjedhësit do të filmojnë dikë që po mundohet tu blerë votën ai ofron 5000 euro, për më tepër nqs ky njeri që do filmohet është vetë Pjerin Ndreu, oferta e Ndocaj është shumë herë më e lartë..plot 50 mijë euro për atë që e filmon.
Nuk na mbetet gjë tjetër veç se të presim nëse kandidati i pavarur Eduart Ndocaj, dikur vetë deputet i PS nën siglën e Rilindjes, do të mbajë premtimin e tij të madh.
