Çështja e ditës në orët e pasdites të kësaj të enjte është viza amerikane e Petrit Vasilit. Gazetarja e VOA-s në intervistën me Monika Kryemadhin ngriti dyshime se numrit dy të LSI-së i është refuzuar viza amerikane. Lidhur me këtë çështje kryetarja Monika Kryemadhi u shpreh se nuk ka informacione. Pak minuta pas përfundimit të kësaj interviste ka ardhur reagimi i Vasilit. I kontaktuar nga Syri.Net, Vasili është shprehur se një lajm i tillë nuk është i vërtetë. Si provë, ai publikoi foton e vizës amerikane.
Por në vizën e Petrit Vasilit ka një problem. Ajo ka skaduar pak muaj më parë, më konkretisht viza nuk është më vlefshmen prej muajit shtator të vitit të shkuar. Por jo vetëm kaq.
Viza e Vasilit është 3-mujore, një fakt ky pak i çuditshëm, pasi zakonisht vizat e lëshuara edhe për qytetarët e thjeshtë ambasada amerikane i lëshon për 1 deri në 3 vite, ndërsa për një politikan të kalibrit të Vasilit është dhënë vetëm për tre muaj.
Kjo foto e vizës amerikane të Vasilit nuk i rrëzon aludimet se atij mund t’i jetë refuzuar dokumenti për të hyrë në SHBA.
