Adoleshenti ekzekuton me mjet prerës dy vajza shqiptare në Florida

Një 19-vjeçar po përballet me akuzën e vrasjes së dy femrave të cilat mendohet se janë nga Shqipëria. Dyshohet se ai përndoqi dhe i vrau me thikë brenda shtëpisë së tyre.

Departamenti i Policisë së Largo në SHBA deklaroi se detektivët dyshojnë se Sage Gayle Curry ndoqi viktimat për në shtëpinë e tyre, pasi i pa ato në publik. Mediat e huaja shkruajnë se gratë u gjetën të pajeta brenda shtëpisë së tyre ndërsa policia u lajmërua nga një fqinj.

19-vjeçari hyri në shtëpinë e viktimave përmes dritares, mori thikën e kuzhinës dhe më pas kreu aktin makabër, duke lënë të vdekur dy gratë që përndoqi më herët.

Pas krimit të rëndë ai u largua nga ndërtesa, ku kërkoi ndihmën e një miku të tij, pasi u lëndua edhe vetë gjatë kryerjes së aktit të rëndë. Policia e Largo nuk dha më tepër detaje sesi mund të jetë plagosur autori i sulmit.