Ndodh dhe kjo/ I riu shkon për të votuar, përballet me të papriturën te pajisja e identifikimit

Vijon të ketë të papritura në këto zgjedhje.

Mësohet se një i ri i quajtur Ledjan Jaçaj, në njësinë administrative Tërpan të Poliçanit, ka rezultuar në sistemin e identifikimit elektronik se ka votuar dy herë.

Ai vetë e ka mohuar një gjë të tillë.

Qytetari në fjalë shprehet se më parë nuk ka votuar dhe tashmë po i mohohet e drejta e votës, për shkak të problemit me makinerinë e identifikimit elektronik të qytetarëve.

Ka qenë sistemi i identifikimit elektronik ai që e ka nxjerrë Jaçajn, sikur ka votuar dy herë. Qendra ku ai ka shkuar për të votuar është ajo me numrin 3370 që gjendet në shkollën 9-vjeçare të Tërpanit.

Sipas KQZ në të gjithë vendin janë ndeshur probleme me identifikimin elektronik në 240 qendra votimit, ndërkohë që thuhet se po punohet që qytetarët të votojnë lirisht dhe pa pengesa.

Identifikimi elektronik i zgjedhësve është një proces që po aplikohet për herë të parë në Shqipëri, dhe është një test më vete dhe për KQZ-në që merret me organizimin e zgjedhjeve.