LIGJET E BIZNESIT
Një javë para zgjedhjeve të 25 prillit, Komisioni Qendror i Zgjedhjeve u ka nisur dy letra partive më të mëdha politike në vendin tonë, PS dhe PD.
Letra konsiston në kërkesën urgjente që kreu Ilirjan Celibashi u bën këtyre subjekteve që të heqin posterat e vendosura në shkelje të kodit zgjedhor duke iu referuar dy rasteve të konstatuara në terren.
Konkretisht, rasti i parë është afishimi nga ana e koalicionit opozitar PD-AN, të një materiali propagandistik në Universitetin Politeknik të Tiranës shfaqur në fasadën e tij.
Ndërsa Partia Socialiste i ka shfaqur në Bashkinë e Gjirokastrës.
“Duke marrë shkas nga fakti i bërë publik i afishimit të dy materialeve propagandistike elektorale, në Bashkinë Gjirokastër, ju kërkojmë të merren masa të menjëhershme për heqjen e tyre”,thuhet në kërkesën e KQZ drejtuar PS-së.
Kujtojmë se sipas ligjit, ndalohet afishimi i materialeve propagandistike në fasadat e godinave të banimit, institucionet publike apo ambientet rrethuese pranë tyre, parqet, në pemët e qytetit dhe shtyllat e ndriçimit.
