Kryetari i PD, Lulzim Basha nga ‘selia e blu’ ka deklaruar mbylljen e protestës së radhës të Opozitës. Duke folur para të gjithë protestuesve, Basha i ka falënderuar të gjithë ata që i shkuan pas për këto tre orë.
Basha u shpreh se pavarësisht kushteve të vështira atmosferike të gjithë treguan se nuk e duan më Ramën kryeministër.
“Mirënjohje për ju zonja e zotërinj, vëllezër e motra. Shqipëria as Europa nuk e kishte njohur ndonjëherë këtë qëndresë e vendosmëri. Për mbi 3 orë litarët e shiut e lidhën shpirtin tuaj me shpresën që buron nga Zoti lart në qiell e bindjen se Shqipëria nuk do kthehet kurrë atje ku ishte 3 muaj më parë nën thundrën e errësirës, krimit e korrupsionit.
“Mirënjohje për të gjithë agjëruesit, Zoti ua shpërbleftë këtë sakrificë të dyfishtë. Mirënjohje për të gjithë ata që iu bashkuan qytetarisë tiranase nga të gjitha anët e vendit. Në veçanti një mirënjohje mikpritësve tanë qytetarëve të Tiranës. Sot treguam se nuk ka forcë të ndalë për kauzën tonë zgjedhje të lira e të ndershme se nuk ka forcë të na detyrojë të ulemi të bëjmë pazare e kompromis me të keqen, e keqja duhet të ikë.
Në një kohë kaq të shkurtër, në mbi 3 orë kur nuk ka pushuar shiu i bekuar, në përfundim të kësaj proteste jemi edhe më të vendosur edhe me të qartë për të sakrifikuar gjithçka për demokracinë, Rama ik. Le të jetë e sotmja, mesazhi i vendosmërisë absolute me të cilën do ta vazhdojmë këtë betejë të mbushur me frymëzim e shpresë, të vendosur deri në fund, të fortë e kurajozë për betejën tonë pa kthim, për liri demokraci, për Shqipërinë si gjithë Europa”, tha kreu i PD.
