“Serbia duhet të kërkojë falje” Vjosa Osmani mban fjalimin e fortë në Kuvend: Të bashkohemi si dy motra, Kosovë dhe Shqipëri

Presidentja në detyrë e Kosovës dhe kryeparlamentarja Vjosa Osmani ka qenë sot e pranishme në seancën parlamentarë që po mbahet aktualisht në Shqipëri.

Ajo u ka bërë thirrje politikanëve që të miratojnë rezolutën për dënimin e genocidit serb ndaj shqiptarëve të Kosovës.

“Serbia duhet të pendohet, të kërkojë falje e të dënohet. Jo të shpërblehet. Kjo duhet të jetë e qartë për këdo, ta themi me zë të lartë këtu dhe në çdo vend të botës. I kam bërë thirrje këtij Kuvendi t’i bashkohet Kuvendit të Kosovës për dënimin e gjenocidit serb.

Që zëri ynë të kumbojë cdokund, në duhet ti bashkëojmë përpjekjet tona. Kosova ka dhënë më të shtrenjtët e saj, ka dhënë mbi 1000 fëmijë, që do ishin këtu ku jeni ju apo në Kuvendin e  Kosovës duke marrë vendime, sikur Serbia të mos ua këpuste jetën që në fillim”, tha Osmani.

Gjithashtu ajo shtoi se Shqipëria dhe Kosova duhet të qëndrojnë pranë njëra-tjetrës si dy motra, që nuk kursejnë asgjë për njëra-tjetrën.

“Ti qëndrojmë pranë njëra-tjetërs, si dy motra që nuk kursejnë gjë për njëra tjetrën. Ti bashkojmë forcat në Kosovë e Shqipëri kundër zërave të urrejtjes. Që e vërteta të mos përmbyset para syve tanë. Është vetëm një e vërtetë që ka ndodhur para syve të gjithë botës: Që serbia ka kryer gjenocid në Kosovë”, shtoi presidentja në detyrë e Kosovës.

Nga foltorja e Kuvendit të Shqipërisë, Vjosa Osmani u bëri thirrje të rinjve këtej dhe andej kufit, dhe atyre në mërgatë, që të ndjekin synimet e tyre.

“Dua t’i thërras të rinjtë e vendeve tona që t’i ndjekin synimet e tyre. Të mos dorëzohen përpara asnjë sfide. Një ditë, do të jenë aty ku duan dhe ku e meritojnë, në majat më të larta të profesioneve të tyre. Kosova dhe Shqipëria do të kenë sukses vetëm atëherë kur të shfrytëzojnë potencialin e popullsive të tyre. Të rinjtë janë ambasadorët tanë në botë”, tha Vjosa Osmani ndër të tjera.