Legjenda mbylli sytë përgjithmonë/ Por ja kush është personi i vetëm që ende nuk e di për ndarjen nga jeta të Maradonës

Bota e futbollit u trondit nga vdekja e legjendes argjentinase Diego Armando Maradona dy ditë më parë.

Ndërkohë në Argjentinë është shpallur një zi kombëtare tre-ditore.

Por ka ende një person që nuk është në dijeni për këtë ngjarje tragjike.

Bëhet fjalë për trajnerin e Maradonës në ekipin kombëtar argjentinas Carlos Billardo, i cili fitoi Kupën e Botës në Meksikë në 1986.

Tashmë në moshën 82-vjeçare ai vuan nga shumë probleme shëndetësore dhe familja vijon t’ia fshehë vdekjen e Diegos.

“Nuk mund t’i them se Diego ka vdekur. Si mund t’i them? Ata kishin një marrëdhënie babë e bir”, tha vëllai i tij Jorge Billardo.

“Infermierët që po e ndjekin vijueshmërinë e tij shëndetësore, ishin informuar tashmë, që nga dita kur Diego u shtrua në spital, se nëse do të ndodhte një gjë e tillë e keqe, televizioni do të duhej të fikej.

Ne i thamë se kishte një problem dhe ne vazhdojmë t’i tregojmë të njëjtën gjë. Unë nuk e di se çfarë do të ndodhë kur ai ta marrë vesh”, deklaroi Billardo.

Carlos Billardo udhëhoqi Argjentinën në tre Kupa Botërore, nga 1982 në 1990 dhe tha që Maradona ishte djali që nuk e kishte pasur kurrë.