LIGJET E BIZNESIT
Gjatë një mbledhjeje me arbitrat afro dy vite më parë, presidenti i FSHF-së, Armand Duka, i urdhëroi ata që të hiqnin dorë nga komentet në rrjetet sociale sa i përket futbollit. Shumica e gjyqtarëve e respektuan këtë vendim, duke u bërë më pak aktivë në “Facebook”, “Instagram” apo rrjete të tjera sociale.
Në këtë mënyrë evitoheshin bisedat publike, të cilat mund të keqinterpretoheshin, për shkak të detyrës që arbitrat bëjnë.
Gjithsesi, me kalimin e kohës ky urdhër i Dukës sikur u harrua dhe tashmë gjyqtarët e futbollit shqiptar nuk e kanë shumë problem për të shfaqur idetë e tyre publikisht, madje të bisedojnë lirshëm edhe me vetë lojtarët e klubeve në rrjete sociale. Këtë herë personazh është bërë gjyqtari i njohur i Kolegjiumit të Tiranës, Kridens Meta.
Ky i fundit është përfshirë në një bisedë që mund ta shikojë çdo njeri në “Instagram”, teksa shkas është bërë një foto e publikuar nga mesfushori i Luftëtarit, Albano Aleksi, vetëm pak orë para ndeshjes me Tiranën për kampionat, që u luajt të dielën në Gjirokastër. Në atë takim kryesor ishte pikërisht Meta, i cili akordoi edhe një penallti për bardheblutë.
“Gjithnjë të fortë”, shkruante Aleksi në diçiturën e fotos ku shihen lojtarët e ekipit gjirokastrit duke festuar në dhomat e zhveshjes. Një ditë më pas (të hënën), Meta gjeti rastin të ngacmonte Aleksin, duke përfshirë në bisedë edhe mesfushorin Donald Rapo, i cili shënoi një supergol ndaj Tiranës. Arbitri kryeqytetas u kujtonte lojtarëve edhe kartonët.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
BISEDA – Fillimisht Meta thumbon Aleksin. “Shyqyr që je shok ekipi me Donald Rapon se keq do e kishe punën…”, shkruan arbitri, ndërsa menjëherë më pas përgjigjet duke qeshur Rapo. “Profesor, mos ma ngacmo shokun se është çun i mirë”, i thotë mesfushori dhe menjëherë më pas shkruan edhe Aleksi, duke i bërë elozhe arbitrit. “Është mjeshtër, përfundimisht di të ndajë situatat”, thotë fieraku i Luftëtarit.
Meta vijon bisedën, duke iu drejtuar Aleksit për Rapon: “Asnjë karton s’ka marrë kur e kam arbitruar, apo jo Albano Aleksi?” Në fund vjen edhe ngacmimi i “hidhur” i Metës për Aleksin, i cili në pjesën e dytë të ndeshjes Luftëtari-Tirana për pak shkaktoi autogol, teksa pas devijimit topi preku traversën. “Nuk e mora vesh dje, mos kishe ngatërruar gjë portat…?!” pyet arbitri mesfushorin e bluzinjve. Këtu mbyllet edhe biseda me protagonist arbitrin e njohur të Superiores dhe dy prej titullarëve të skuadrës gjirokastrite./Panorama
